黃子華笑話 — 高僧與補鞋仔

從前有一個佛寺,

呢個佛寺d香油不嬲都唔多架喇,

但係都有一個住持就同埋有一個補鞋仔係度掛單既,

但係有一日個住持就同個補鞋仔講:

『補鞋仔,我睇怕你住埋今日呢,你聽日都要走喇,

因為到左聽日我師傅番黎,我師傅見到我呢兩年冇乜點做過功課,

就一定帶我雲遊四海走去修道,你聽日都係走啦!』

補鞋仔聽到:『喂,你師傅有乜咁巴閉呀,聽日等我黎應付佢!』

好,於是又信佢一舖,

果然,聽日呢就等個補鞋仔黎到應付呢個高僧,

第二日,呢個高僧果然駕到呢個佛寺,

嘩,佢雙眉長過鬚,好犀利,

一入黎,個高僧望住個補鞋仔四目交投,

即刻開始切磋,

高僧拍一拍自己個頭,

補鞋仔踏一踏自己隻腳喎,

高僧拍一拍個心口,

補鞋仔呢就拍一拍個背脊,

高僧於是遞起兩隻手指,

而個補鞋仔呢就遞起四隻手指,

高僧最後舉起五隻手指,

而補鞋仔就舉起一隻手指,

高僧即刻就落荒而逃直往山下奔去,

呢個住持覺得好奇怪點解師傅會好似輸左咁樣走落山既呢?

連忙衝落山搵番師傅:『師傅,究竟發生咩事呀?』

師傅話:『嘩!犀利喇頭先,我頭先係個佛寺裡面見到一個道行非常高超既小童,

呢個小童我同佢講我頭頂三十六天宮,佢就話佢腳踏七十二地獄,

我同佢講我胸懷日月,佢就話佢背負乾坤,

我同佢講我有亨哈二將,佢就話佢有四大金剛,

我同佢講我有五行大法,佢就話佢有中庸之道,

咁犀利,我唔走,等出醜咩?』

啊!呢個住持聽到就連忙衝...衝番上山問個補鞋仔:

『補鞋仔,真係睇唔出你咁有料到喎!』

補鞋仔就話:『有咩料到丫?你個咩高僧師傅冇鬼用既,衣衫襤褸,

一入黎就同我講要補帽喎,我話我補鞋架喎,

咁跟住佢就同我講要用胸皮,胸皮咁貴,採佢都傻啦,梗係用背皮啦,

跟住佢就話我出兩文錢啦,兩文錢呀?梗係四文啦,

咁跟住佢就話唉,咁咪搞呀,我唔滯呀,

咁我話唔滯呀?咁凸你啦』